Kamanda Simon Sirro: Bodaboda marufuku kuegeshwa kwenye vituo vyao maalumu kwa ajili ya kusubiri abira baada ya saa 6:00 usiku

Akizungumza na waandishi wa habari jijini Dar es Salaam juzi, Kamanda wa jeshi hilo kanda maalumu ya Dar es Salaam, Simon Sirro, alisema kuwa kuanzia sasa, ni marufuku kwa bodaboda kuegeshwa kwenye vituo vyao maalumu kwa ajili ya kusubiri abira baada ya muda huo, lengo likiwa ni kuimarisha usalama wao na watu wengine jijini Dar es Salaam. 

Akifafanua, Kamanda Sirro alisema kuwa wamelazimika kutoa agizo hilo baada ya kubaini kuwapo kwa matukio mengi ya uhalifu yanayohusisha uporaji wa bodaboda kutoka kwa madereva hao nyakati za usiku. Kwa mujibu wa Kamanda Sirro, haingii akilini kwa madereva wa bodaboda kuendelea kukaa kwenye vijiwe wakisubiri abiria usiku kucha ilhali ikifahamika wazi kuwa baada ya saa 6:00 usiku huwa hakuna abiria wa kuwasubiri hasa kutokana na ukweli kuwa watu walioko kwenye maeneo ya starehe kama baa huwa tayari wameshaondoka baada ya maeneo hayo kufungwa kila inapofikia mida hiyo. 

Siyo nia yetu kuzungumzia kwa undani juu ya agizo hilo. Bali, tunatambua kuwa kwa ujumla wake, lengo la Polisi katika kanda maalumu ya Dar es Salaam ni kuhakikisha kuwa mara zote, usalama wa raia na mali zao unabaki kuwa wa uhakika. Hata hivyo, jambo pekee tunalodhani kwamba ni vizuri likazingatiwa kwa umakini ikiwa utekelezaji wa agizo hilo utaanza ni kuona kuwa busara inatangulizwa. Kwamba, badala ya kuanza kutumia nguvu kungali mapema kwa nia ya kushinikiza utekelezaji wa ratiba hiyo, ni vyema polisi wakatoa elimu ya kutosha kwa wahusika ili kuepusha rabsha zinazoweza kujitokeza. 

Madereva wa bodaboda waelezwe ni kwa nini kuanzia sasa hawaruhusiwi kuwa kwenye vituo vyao wakisubiri abiria usiuku wa manane. Waelezwe kwa kina ni kwa namna gani utekelezaji wa agizo hilo utaimarisha usalama kwao na kwa jamii inayowazunguka. Kwa mfano, ni vizuri madereva wa bodaboda wakaelezwa namna wanavyoweza kupata matatizo pale wahalifu watakapowapora pikipiki zao nyakati za usiku na kwenda kuzitumia katika matukio ya ujambazi. Waelezwe kwambva katika matukio ya aina hiyo, ikiwa pikipiki husika itakamatwa, ni wazi kwamba watakaosumbuka na hata kuwekwa ndani wakati uchunguzi ukiendelea ni pamoja na wao wenyewe. Aidha, jambo jingine muhimu kuzingatia kungali mapema ni kwa jeshi la polisi kufafanua kwa uwazi kuwa kinachozuiwa ni madereva wa bodaboda kukaa vijiweni kwao usiku wa manane wakisubiri abiria. 

Isije kuonekana kuwa baadhi ya askari wakitafsiri vibaya agizo hilo kwa kuwasumbua watu wanaoendesha pikipiki barabarani nyakati za usiku baada ya saa 6:00. Ni kwa sababu, kwa mujibu wa Kamanda Sirro, kinachokatazwa ni madereva wa bodaboda kukesha vijiweni mwao wakisubiri abiria. Ni imani yetu kwamba hakuna dereva wa pikipiki atakayekamatwa akiwa barabarani kwa tuhuma za kukiuka agizo la kutokaa vijiweni baada ya saa 6:00 usiku